Krasniqi: Zgjedhje, sa më shpejt
Deputeti i PDK-së, Memli Krasniqi, kërkoi që sa më shpejt të shpallet data e zgjedhjeve të reja.
“Zgjedhjet të shpallen menjëherë, sot apo nesër”, tha Krasniqi.
Ai deklaroi se koha për mbajtjen e zgjedhjeve është e diela e parë brenda 30-ditëshit, sipas afatit kushtetues.
Krasniqi akuzoi LVV-në për situatën e krijuar, duke thënë se “janë humbur nëntë muaj kohë” për shkak të bllokadave, vonesave dhe taktizimeve.
S’kanë vota, kemi zgjedhje, sërish
Mandatari i dytë i Lëvizjes Vetëvendosje, Glauk Konjufca, nuk ka arritur t’i marrë votat e nevojshme për t’u zgjedhur kryeministër
Pro Konjufcës votuan vetëm 56 deputetë, 4 abstenuan dhe 53 ishin kundër.
Me dështimin e dytë për formimin e ekzekutivit, hapet rruga për zgjedhje të reja. Presidentja e Kosovës, Vjosa Osmani, është e obliguar t’i shpallë zgjedhjet e parakohshme që duhet të mbahen brenda 40 ditësh nga dita e shpalljes.
Haradinaj “qorton” Konjufcën
Kryetari i AAK-së, Ramush Haradinaj, kritikoi Konjufcën që listoi prioritetet vetëm për vitin 2026, ndonëse ai kërkon votën e deputetëve për të qeverisur deri në vitin 2029.
Ai komentoi fjalimin e Konjufcës gjatë prezantimit të kabinetit qeveritar, duke e qortuar për mos-përmendjen e luftës kundër korrupsionit.
“Ose e keni harruar, ose mendoni se nuk ka më nevojë ta luftoni korrupsionin, sepse tash jeni ju në pushtet”, shtoi Haradinaj.
Haradinaj u ndal posaçërisht edhe te zhvillimet në veri të vendit, të cilën e quajti “kartën kryesore” të LVV-së.
Ai potencoi se është gëzuar nga sukseset e Kosovës në veri, por shtoi rendi dhe ligji do të forcohen edhe më shumë pa LVV-në.
Abdixhiku: Kurti si Don Kishoti, po krijon veç kundërshtarë
Kryetari i Lidhjes Demokratike të Kosovës, Lumir Abdixhiku, ka krahasuar kryeministrin në detyrë të Kosovës, Albin Kurti figurën letrare të Don Kishotit, i cili, sipas tij, po krijon veç kundërshtarë.
“Sikurse Don Kishoti i Miguel de Cervantes edhe Albin Kurti i LVV-së zgjohet çdo mëngjes në një botë që e ka krijuar vetë dhe në atë botë Albin Kurti i LVV-së sheh dhe krijon veç kundërshtarë”.
Ai akuzoi Kurtin se po ndërton armiq imagjinarë për t’i mbuluar dështimet në ekonomi, në politikën e jashtme dhe në skandalet e korrupsionit.
“Kundërshtarët e tij janë gjithkah, në Parlament, në Prokurori, në gjykata, në media. Në vend se të merret me realitetin e vendit – me ekonominë e rënduar, me izolimin, me skandalet korruptive – ai zgjedh të luftojë ‘mullinjtë e erës’. Asnjë problem real i qytetarëve nuk është prioritet i tij”, deklaroi Abdixhiku.
Lideri i LDK-së ka thënë se qasja e Kurtit është e shkëputur nga interesat e vendit dhe se, sipas tij, ai funksionon politikisht vetëm përmes tensioneve dhe përplasjeve.
Ai tha se LVV-ja humbi 15 ditë kohë, pasi nuk ka vota për Qeverinë e Konjufcës, duke e cilësuar këtë seancë si “shfaqje teatrale”.
